Russia sipai thlawhtheihna tlaah mi 13 thi
Russia chhimthlang lam, Ukraine nena an inrina bula Yeysk khuaah Thawhṭanni tlai khan Russia sipai thlawhtheihna a tla a, mi 13 an thi tih thuneituten an sawi. Thi zingah hian naupang pathum an tel.
Ministry of emergency situations chuan an thlawhtheihna chesualah hian a tirah mi pathum an thih thu puan ni mah se, chhanchhuah hna thawktuten ruang 10 an hmuh belh leh tih sawiin, "An vaiin mi 13 an thi a, naupang pathum an tel. Mi dang 19 in hliam an tuar bawk a ni," a ti. Chhanchhuah hna thawh hi nimin tihtawp a ni tawh bawk.
Thawhṭannia thlawhtheihna chesual hi Sukhoi Su-34 a ni a, a tlakna hi mihring chenna bial, mi 600 vel chenna hmun niin, kangmei nasa tak a chhuak zui a ni.
Russia president Vladimir Putin chu chetsualna thleng leh kangmei chhuah thu pawh hriattir nghal niin, thlawhtheihna chesuala chhiat tawkte chu an mamawh ang chhawmdawlna leh ṭanpuina pe turin thupek a tichhuak nghal niin Kremlin chuan a tarlang.
Thlawtheihna tlak vanga kangmei chhuak hian building chhawng nga, square meter 2,000 vela zau a kangkai hman niin ministry of emergency situations chuan a sawi.
Defence ministry chuan pilot-te chu an tlak hmain an inkapchhuak, eject hman tih a tarlang.
He thlawhtheihna hi Southern Military District-a military airfield aṭangin training flight nei tura thlawk chhuak a ni a, mahse a thlawh chhuah hnuah a khawl lam chiang loin, engine pakhat chu a kang a ni. A chetsual chhan hi investigative committee chuan a chhui zui nghal dawn a ni.
Russian civilian aircraft leh warplanes chetsualnate hi a thleng fo a, mihring tihsual emaw khawl lam fel tawk loh emaw avanga thleng a ni chawk ṭhin. Kumin June thla khan, Moscow chhimchhak lam, Ryazan khawpuiah sipai thlawhtheihna tla avang hian mi pali an lo thi tawh bawk.