China-in president Xi Jinping thlaktu tur ruat lo

China chuan an ram senior leadership committee thar tur a tichiang tawh a, kalphung pangai ang lo takin an President Xi Jinping thlaktu tur ruat a la ni lo.

Hetiang thil a nih tak siah chuan Xi Jinping hian kum nga leh a aia tam pawh China-ah hian ro a la rel dawn niin a lang. China sorkar hnuaia peng lian ber Politburo Standing Committee-ah member thar panga ruat an ni a, an vai hian pasarih ruat an ni. President Xi Jinping (64) leh premier Li Kequiang (62)-te chiah hi an dinhmun ngaia ding leh an awm a, anni bakah hian Vice Premier Wang Yang (62), executive vice-premier, Han Zheng (63), Zhao Leji (60), Li Zhanshu (67) leh Wang Huning (62) te chu ruat thar an ni bawk.

China ram hruaitute hian hun engemawchen chu an term tawp ber ṭan dawnah an mahni thlaktu tur mi an nominate lawk ṭhin a, mahse Xi erawh hi chuan hetiang hian a ti ve ta rih lo a ni.

Tuna standing committee meber atana ruat tak te hi kum 60 chuang vek an nih tawh avangin an term zawh huna anmahni thlak tu tur ruat a nih lo chu China mipuite mak tih a hlawh hle dawn a ni.