Venhimna khauh tak hnuaiah Kenya inthlang
Venhimna khauh tak hnuaiah Kenya chuan inthlan a hmachhawn ta a, an ram sana-a Ningani zing dar 6 aṭang khan vote an thlak ṭan a ni. Inthlan tur hi eptu pawl lam leh human activist ṭhenkhatin tihkhawtlai tumin ṭan la nasa hle mah se kaltlangpui a ni ta tho a ni.
Kenya President Uhuru Kenyatta chuan hnehna chan leh ngei tumin an ram mipuite chu vote thlak ngei turin a sawm a, buaina siam lo turin a chah bawk. Eptu pawl hruaitu Raila Odinga chuan he inthlanna hi a sawisel nasa hle thung a, amah thlawptute chu inthlan hi ṭhulh a nih theih nana boycott turin a ti a ni.
Dodalna leh duh lohna a nasat em avangin venhimna ṭha tak hnuaiah kalpui a ni a, police tam takin vote thlaktute an veng a, polling station-ah duty an ṭhahnem hle a ni. Polling station hawn a nih rual hian eptu pawl lamte chuan hmun ṭhenkhatah kawng dan tumin hma an pungkhawm a, mah se police-te chuan tear gas hmangin an hnawtdarh a ni.
Kenya President thlanna hi August 8 khan neih a lo ni tawh a, khatah khan Kenyatta hian hnehna a chang a, hei hi eptu pawl Odinga kaihruaite chuan an ram dan kalha inthlan hi kalpuiah puhin Supreme Court-ah an hek a ni. SC chuan an hekna hi pawmin ni 60 chhunga inthlanna hi neih ṭhat a nih leh tur thu a puang ta a ni.
Tunkar tir khan human activist ṭhenkhate chuan inthlan hi ralmuang taka kalpui theih a ni dawn lo tih sawiin, SC-ah hian inthlan chungchang ngaihtuah ṭha leh turin ngenna an theh lut a ni. SC chuan hei hi pawmin Nilaini khan ngaihtuah leh tur a nih thu thuchhuah a siam. Mahse he mi chungchang ngaihtuah tur hian Supreme Court judge pasarih zinga pahnih chiah an inlan a ni. Deputy Chief Justice Philmoena Mwilu vengtu chu chu Thawhlehni khan kah hliam a nih avangin a kal thei lo a, judge dang erawh hi chu an kal theih loh chhan tarlan a ni lo. Hemi a nih avang hian SC chuan inthlan kalpui ṭhulh tura ngenna hi a ngaihtuah thei ta lo a ni.
Kenyatta leh a pawlte chuan inthlan ṭhulh a ni lo tih an hriat hian an lawm hle a, he tih lai hian eptu pawl lam chuan inthlan hi tihsukuk tumin an theihtawp an chhuah ve reng tho a ni. Odinga chuan Kenytta sorkar chu "Dictatorship" tiin a sawi a, election fair taka kalpui an duh thu a sawi bawk.