East Jerusalem-ah Israel-in chenna-in 176 sa dawn

Israel thuneitute chuan East Jerusalem-ah an ram chin zauh a nih tur thu sawiin, Jerusalem Municipal chuan Nof Zion-ah chenna-in 176 sak belh phalna a pe tih an sawi.

Nof Zion hi jabal Mukaber, Palestina district-in a hual a ni. Hemi avang hian Palestina lam chuan an dem hle a, international community chona niin an ngai. International community chuan East Jerusalem hi Palestina ram chinah a puang a ni. Israel hian East Jerusalem leh West Bank-ah hian 1967-a Middle East War zawh aṭang khan awm hmun a bengbel a, 1980 khan East Jerusalem hi Israel hian international community hriatpuina loin a laksak a ni.

East Jerusalem-ah hian Jewish 200,000 vel leh Palestinian 370,000 vel an cheng mek a, international law hnuaiah chuan Jewish mite hi dan lo a chengah ngaih an ni a, mahse Israel chuan hei hi a hnial ve thung. Israel chuan Jerusalem zawng zawng hi an khawpuiah an ngaih laiin, Palestina lam chuan East Jerusalem hi an khawpui la ni mai tura an tih a ni ve thung.

Jerusalem mayor Nir Barkat chuan Nof Zion-a chenna-in tur sakbelh chungchang hi sawiin, Jerusalem chu pumkhata an siam mek thu a sawi. Palestina Liberation Organisation member Wasel Abu Youssef chuan international community chona a nih thu a sawi ve bawk.

Ngaihdan a inan loh avang hian Israel hmalak tumna hi tihkhawt lai a nih rin a ni a, remna palai pakhat chuan buaina chinfel phawt a nih tur thu a lo sawi ve bawk a ni.

Kar kalta khan Israel hian West Bank-ah chenna-in 2,600 sak a nih tur thu a lo chhuah tawh bawk a, hei hi European Union lam pawhin an sawisel nasa hle a ni.