Europe ram hrang hrangah nawrh huaihawt
Europe ram hrang hrangah tun hnaiah mipuiten energy man sang leh, khawsak hautak chho zel avangin lungawi lohna an lantir a, hnathawktu pawl hrang hrangten an hlawh chungchangah lungawi lohna an lantir bawk.
France
France ramah chuan Thawhlehni khan pawl hrang hrangin ram pum huapin nawrh an huaihawt. Hei vang hian ram pumah rel service pawh a khaihlak phah. Nawrh huaihawt hian public sector pawh a nghawng tel a, school ṭhenkhat pawh khar a ngaih phah a ni.
Pathianni khan Paris khawpuiah mi tam takin thil man sang duh lohna lantirin kawng an lo zawh tawh bawk.
Britain
Brtiana rama GXO.N driver 1,000 vel chuan tun thla tawp lam hian ram pumah ni nga chhung nawrh huaihawt an tum tih an sawi. Britain rama container port lian ber zinga mi, Liverpool port-a thawktute pawhin an hlawh leh hna chungchangah lungawi lohna lantirin October 24 aṭangin kar hnih chhung nawrh huaihawt an tum bawk.
September leh October thla tir lam khan Royal Mail postal worker 1,14,000 awmna, Communication and Workers Union chuan an hlawh leh hnathawh danah lungawi lohna lantirin nawrh an lo huaihawt tawh bawk a, an thil phutte tihhlawhtlin a nih loh chuan nawrh huaihawt chhunzawmah thuneitute an vau.
Britain-a nursing union lian ber, member nuai thum chuang awmna pawhin an hlawh tihsan an phut a, railway worker-te pawh an hlawh leh job security chungchangah an lungawi lo bawk.
Germany
Lufthansa-a (LHAG.DE) Eurowings pilot-te chuan Thawhṭanni aṭang nimin thleng khan an working hour siamṭhat phutin ni thum chhung nawrh an huaihawt. Nawrh huaihawt hian airline passenger-te a nghawng buai hle.
Hungary
Hungary zirlai leh nu leh pate chuan hlawh tihsan phuta zirtirtu nawrh huaihawt, an hna aṭanga bante an nih avanga lungawi lohna lantirin October 14 khan rally pui tham tak an nei a, hei hi zirtirtu an thlawpna lantira rally an neih ṭum hnihna a ni. Hetih lai hian thuneitute chuan zirtirtu nawrh huaihawt zinga mi dangte pawh banah a la vau a ni.
Czech Republic
Czech Republic sorkarin energy man a tihsan avang leh, NATO leh European Union-a member an nih duhlohna lantirin an ram khawpui, Prague-ah nawrh an huaihawt. Nawrh hi far-right leh fringe group-te buatsaih a ni.
Belgium
Belgium-ah pawh September thla khan energy man sang leh, khawsakna man hautak zel duh lohna lantirin nawrh huaihawt a ni. June thla khan Belgian worker 70,000 vel chuan lungawi lohna hi an lo lantir tawh bawk.