Myanmar tan-in chhunga bomb puak mi 8 an thi

Myanmar rama tan-in lian ber, Yangon-a Insein tan-in chhungah nimin zing dar 9:40 vel khan parcel counter bulah ṭum hnih bomb a puak a, mi pariat an thi a, mi dang 13 an hliam bawk.

Independent news portal, Myanmar Now-in a tarlan danin tan-in chhunga thil puak vanga thi zinga pathum chu official niin, mi dang panga chu tan-in tlawhtu, visitor-te an ni. He thil thlenna hmunah hian police-te tir nghalin, an chhui chiang mek a ni. Bomb a puah hnu hian silai hmehpuah ri pawh hriat tur a awm nia sawi a ni.

Insein tan-inah hian mi 10,000 dawn an tang mek a, an zinga tam tak chu politics thila mante a ni. Sipai sorkar duh lohna lantira nawrh huaihawt zinga an mante pawh he hmunah hian tantir an ni bawk. Ram dang mi tang pawh eng emaw zat awmin, an zingah hian tun hnaia court-in kum 10 tang tura a hrem, Japanese journalist Toru Kubota pawh a tel. Myanmar-a UK ambassador hlui, Vicky Bowman pawh a foreigner registration certificate-a address a ziahlan ni lo, in dangah a chen avangin kum khat tanga tura hrem a ni a, Insein tan-inah hian a tang mek bawk.

Tan-in chhunga pawikhawihna thleng vang hian nimina tan-in bul court-a thubuai ngaihtuah turte pawh ṭhulh a ni.

Pawikhawihna thleng hi eng pawl mahin an tih a nih thu an la sawi lo.