Ukraine FM-in Iran nena an inzawmna titawp duh
Ukraine foreign minister Dmytro Kuleba chuan Russia-in an ram beihna atana Iran siam drone a hman avangin, president Volodymyr Zelenskyy hnenah Iran nena an inzawmna titawp tura rawtna a thlen thu a sawi.
Russia hian Thawhṭanni khan 'kamikaze drone' eng emaw zat hmangin Ukraine hi a bei a, energy leh civilian infrastructure-te kapin, civil mi pariat an thi a ni.
Ukraine chuan he inbeihnaah hian Iran siam Shahed-136 kamikaze drone hman a nih thu a sawi a, mahse Iran chuan heng drone-te hi Russia hnenah a supply lo niin a sawi thung.
Dmytro Kuleba chuan, "Iran drone-in Ukraine civil infrastructure a tihchhiat dan te, civil mite thihna leh natna a thlen dante leh Russia hnena ralthuam dang a supply belh theih dante thlirin, President hnenah Iran nena inzawmna leh kan inpalaitawnna pawh titawp vek turin rawtna ka thehlut a ni," a ti. Ram pahnihte inlaichinna tihtawp chung changah Iran chu mawhphurtu vek a ni tur thu a sawi a, European Union hnenah pawh Russia a puih avangin Iran hrekna siam tura a nawr thu a sawi bawk. Hei bakah hian Israel hnenah pawh air defence system supply tur leh an thawhpuina dilin ngenna a thawn tur thu a sawi.