Kenya election-ah vote 34% aia tlem a tla

Kenya Electoral Commission chuan thuchhuah siamin, Ningania Presidential election an neih zawh takah khan 34% aia tlem mah vote a tlak thu an sawi. August thlaa inthlan an neihah kha chuan 80% vel zet vote a tlak thu sawiin, tun ṭuma an inthlan ṭhatah hian vote a tlak chhiat thu an tarlang.

Vote tlak tlem chhan hi eptu pawl hruaitu Odinga leh a pawlten inthlanna hi hmun tam takah an boycott vang a nih thu report chuan a tarlang. Police leh eptu pawlte an innawr nasat avangin vote thlakna hi hmun li laiah suspend a ni.

Kenya President Kenyatta chuan inthlanah hian hnehna chan ngei a inbeisei a, chutih laiin eptu pawl lam chuan inthlan hi nasa takin an dodal a, mi pahnih-in nunna an chan tawh bawk a ni.

Odinga hian amah thlawptute chu tharum hmanglo turin ti mah se, hmun tam takah tharum hmanga vote thlak tumte hi dan an ni tho a ni. Kenya hi August 8 khan an inthlang tawh a, eptu pawl lamin ram danpui kalha inthlanna hi kalpui a ni tiin, Supreme Court-a hekn an thlen avangin SC chuan inthlan hi buatsaih ṭha leh turin thuchhuah a siam ta a ni.

Ningani a an inthlan ṭhatah hian beisei angin vote a tla ṭha lo a, eptu pawl lamin an dodal mai piah lamah, ram mipuiten inthlan buaipuitute an rin zawh tawh loh avangin vote hi a tlaṭha lo tih tarlan a ni.