Catalan buaina chungchangah Spain Senate-in vote la dawn

Catalonia buaina kal zelah Spain sorkarin hmalak a tumna chu kal tlangpui a nih dawn leh dawn loh thuah, Spain Senate chuan vote a la dawn.

Senate hian Catalan President bang tura tihna chu a pawmpui ngei rin a ni a, hetih lai hian Catalan regional Perliament lam chuan independece puan a nih theih dan an lo ngaihtuah ve mek bawk.

October 1 khan Catalonia president Puigdemont chuan independence a puang zet a, mahse a hnuah Spain sorkar chu inbiakna neihpuiah a sawm leh a ni. Catalan sorkar chuan an ram mipui 43% vote thlak zinga 90% chuan independence hi an duh niin an tarlang a, mahse Spain sorlar chuan he vote thlak hi dan kalh a ni a ti ve thung.

Ningania Catalan parliamentary session neihah Catalan sorkar thupuangtu chuan independence tura hmalak dan tur kawng an sawiho chu, nimin khan dan siamtute hnenah theh luh a nih thu a sawi. Independence duhtu lam chuan zalenna an neih ngei theih nan hian theihtawp an chhuah chhunzawm zel a ni.

Hetih lai hian Ines Arrimadas, anti-independence Citizens' Pary leader chuan, Puigdemont chuan buaina chinfelna tur kawng tamtak a pumpelh tawh thu sawiin, dan anga thil kalpuina hun a la nei a ni tih hrilhin inthlan buatsaih turin a ti.

Senate chuan Spain sorkarin an ram danpui Article 155 hmanga Catalonia autonomy thuneihna chhuhsak a tum chu kalpui a nih leh nih loh tur thuah vote a la dawn ta a ni. He article hi vawikhat mah hman a la ni ngai lo a, Spain Prime Minister Mariano Rahoy chuan he dan hmang hian Catalonia-a thuneitute chu paihthlak a, inthlan ṭhat buatsaih a tum a ni. He dan hi kal tlangpui a nih chuan Catalonia police, media-te leh finace lam thlengin Madrid thuhnuaiah a awm dawn a ni.

Rajoy sorkar hian Senate-ah hian seat tam zawk a la sa a, eptu pawl lam pawhin hemi kawngah hian an thlawp thu an lo sawi ve tawh bawk.