Trump-a'n JFK thihdan chungchang file a tlangzarh

US President Donald Trump chuan President hlui John F. Keneddy-a thah a nih chungchang inziahna file 2,800 tlangzarh tura thu a pek tawh chu Ningani khan National Archive-te'n en theihin an chhawpchhuak.

Report ṭhenkhatin a tarlan dan chuan heng file a tlangzarh zingah hian ram himna nghawng thei file ṭhenkhat erawh CIA, FBI leh Department ṭhekhatin tlangzarh lo tura an ngen avangin tlangzarh a ni lo. JFK thah a nih dan chungchangah hian inhnialna tam tak a awm a, hemi a nih avang hian heng file tlangzarh a ni pawh hian mipuite ngaihven a hlawh hle a ni.

Kum 1992 khan Congress chuan JFK thah a nih dan chungchang file-te hi kum 25 hnuah tlangzarh a nih tur thu an lo chhuah tawh a, he file hi phek nuai nga vel a nih thu report chuan a tarlang.

National Archive-in Ningania file eng emawzat a tlangzarh leh takah hian file 90% aia tam mah chu mipuite hmuh theihin a awm ta a, file ṭhenkhat la tlangzarh loh te hi thla ruk chhung ennawn leh tura tih a ni.

Donald Trump chuan America mipui-te'n thudik hriat an phu thu a sawi.