Malaysia-in November 19-ah inthlanpui nei dawn

Malaysia Election Commi­ssion chuan an ram inthlanpui chu November 19-ah neih a ni dawn tih nimin khan a puang.

Inthlanpui neih rual hian state 13-ah assembly inthlan neih nghal a ni bawk ang. Inthlan neih turah hian vote nei maktaduai 21 vel an awm.

Hun pangngaiah chuan inthlan hi nakkum September vela neih tur a ni a, mahse ṭang­rual sorkar a ngheh tawk loh avang leh, tualchhung politics buaina a awm reng vangin a hun hmain inthlan hi buatsaih a ni dawn a ni.

Prime minister Ismail Sabri Yaakob chuan inthlanpui buatsaih hma a nih theihna atan kar liam ta khan Parliament a lo ṭhiat tawh a, inthlan hi buatsaih hma a nih chuan sorkar ngelnghet zawk a din theih phah a beisei thu a sawi. Kum li chhungin Malaysia hian prime minister pathum a nei hman a ni.

Kum 2018-a inthlanpui an neihah khan rorellai, United Malays National Organisation (UMNO) chu state fund 1MDB-a US dollar tluklehdingawn tel tihchingpen chungchanga an mualpho avangin kum 60 chhung thuneihna an chelh tawh chu hum zo loin, an chak zo ta lo a ni.

Election Commission chairman Abul Ghani Salleh chuan press conference-ah November 19-ah inthlanpui neih a nih tur thu puangin, November 5 aṭangin inthlana chuh tumte tan nomination paper thehluh theih a ni dawn tih a sawi. Tun ṭum inthlanah hian kum 97 mi, prime minister hlui Mahathir Mohamad pawhin a chuh leh ngei rin a ni bawk. Campaign nan hian ni 14 chhung chauh hun an nei thei dawn a ni.

Abdul Ghani chuan inthlan­pui neih tura senso hi USD maktaduai 213 vel a ni dawn niin a sawi.