Chad ramah tuilian vangin state of emergency a puang

Chad president Mahamat Idriss Deby chuan an rama tuilian vangin state of emergency a puang. Tuilian hian mi maktaduai khat chuang a nghawng a ni.

Chad ramah hian fur lai, May - October thla chhung hian ruah sur nasa avangin tuilian hi a thleng fo a ni. Kuminah chuan kum dang aiin ruahtui a tla hma a, hei bakah kum tam tak chhunga ruahsur nasa ber ṭum a ni bawk.

Ruahsur nasa avanga tuilian hi ram chhunga province 23 zinga 18-a khaw 636 ten an tuar tih President chuan a sawi. Harsatna tuar nasa zualte chu chhim lam province - Mayo Kebbi Est, Logone Occidental, Tandjile, Moyen-Chari leh Mandoul-te an ni.

Tuilian hian thlai chinna ram hectare 4,65,000-a zau a chim a, ranvulh 19,000 vel an thi bawk tih President chuan a sawi. An ram khawpui, N'Djamena-ah pawh tuilian vangin mi tam takin an chenna in an chhuahsan a ni.

United Nations chuan Chad mipui maktaduai 5.5 vel chu chhawmdawl ngaiin an awm mek tih a sawi a, World Bank pawhin an ram mipui maktadsuai 16 zinga 42% chu rethei takin an awm a ni, a ti. Heng mite hi an awmna turte, an khawsakna atana mamawh zualpui leh damdawi lam enkawlnate pek an ngai tih President Debyu chuan a sawi.