December-ah Catalonia inthlang dawn

Spain sorkar chuan Catalonia chu kumin December-ah an inthlan tur thu a puang a, Catalo­nia region President Charles Puigdemont pawh he inthlanah hian a chuh duh a nih chuan pawmsak a nih tur thu a tarlang.

Catalonia Parliament-in vote laa indenpendece a puan hnu khan Spain sorkar nen hian an inhmu­thiam lo zui a, Spain hian cata­lan autonomy chu an ram danpui Articel 155-na hmangin a thuneihna a chhuhsak zui bawk. Hei hi preisdent Puigdemont leh a thurualpui te chuan an duh lo hle a, Spain sorkar chu mipui duhdan kalh zawnga rorelah an puh hial a ni.

Spain sorkar chuan inthlan hi December 21-ah neih tura ruahman a nih thu a puang a, Spain sorkar thupuangtu Mendez de Virgo pawhin Puigdemont chu he inthlan lo awm turah hian a tel ngei a beisei thu a sawi a ni.

Puigdemont chuan a thu­neihna aṭanga paihthlak a ni hi a pawm loh thu a lo sawi tawh bawk a, amah thlawptute chuan Spain sorkar thiltih dan hi duh loin kawngte an lo zawh tawh bawk a ni.

Hetih lai hian Catalonia mipui ngaihdan hrang hrang an lakkhawmah chuan, maktaduai 5.3 zet chuan Spain aṭanga inlak hran hi an duh lo thung a, heng a duh lo tute hi Catalan mipui zatve aia tam mah an nih thu tarlan a ni bawk.

Catalonia sorkar paihthlak a nih hnuah Spain Deputy Prime Minister, Soraya Saenz de Santamaria chuan he bial hi a enkawl zui a, Spain interior minister chuan Catalonia Police thuneihna hi a chang thung tih official-te chuan an tarlang a ni.

European Union, United States leh Mexico ramte chuan Catalan sorkar thiltih dan hi duh loin Spain sorkar an thlawp thu an sawi a ni.