US Defence Secretary-in N Korea chet dan sawisel

South Korea-a ni hnih cham tura zin, US Defence Secretary Jim Mattis chuan North Korea chu nuclear buaina chawkchhuak tuah puhin, nuclear leh ballistic missile a test fo chu a dem thu a sawi.

South Korea Defence Minister nen inkawm­na an neih zawha press conference-ah Jim Mattis chuan, Pyongyang-in khawvel a tih ralṭit thu sawiin United States chuan a ṭanpui ramte ven­himna kawngah theihtawp a chhuah zel tur thu a sawi a ni. Mattis chuan South Korea nen thawhhona ṭha an neih zel thu sawiin, Washington leh Seoul chuan thawhhona tur thar hmanhmawh thlak tak an neih thu a sawi bawk. NKorea chu a ṭhenawm ram tana harsatna thlenah puhin, tun hnaia nuclear leh missile a test chu dan kalh a nih thu leh thil ṭul lo tak a nih thu a sawi bawk a ni.

US leh a thurulpuite beitu chu hneh an nih zel tur thu sawiin, nuclear ralthuam hmang an awm pawhin US chuan a sipai chakna hmangin nasa thei ang berin a beilet dawn a ni, a ti. South korea leh US in missile hmanga invenna an dah chungchang pawh sawiin, American leh South Korea mi nuaih tamtak hei hian a venghim a ni, a ti bawk.