Somalia-a car bomb puakah mi 23 an thi

Somalia khawpui Mogadishu-a hotel lar tak kawtah Inrinni khan thichilh bomb a buak a, he car bomb puak vang hian mi 23-in nunna an chan a, midang 30 aia tam mahin hliam an tuar bawk a ni. Car bomb puah hnu hian inkahna a thleng zui a, hmun dangah pawh bomb hi a puak ri hriattur a awm bawk a ni.

Somalia sipai Capt. Mohamed Hussein chuan Nasa-banlod Hotel chhungah inkahna hi a thlen thu a sawi a, security force leh firfiak pawl-te chu bomb puah hnu hian hun eng emaw chen an inkap zui a ni, a ti. An inkah lai hian hotel chung berah mi 20 vel an awm a, sorkar official pawh eng emaw zat an tel tih a sawi. He inkah-naah hian firfiak panga zinga pahnih chu hotel chhungah hian kahhlum an nih thu Hussein chuan a sawi bawk.

Africa rama Islamic firfiak pawl Al-Shabab chuan he car bomb puak hi an tih a nih thu an puang nghal a, hotel chhungah pawh an mi te an awm ngei thu an sawi bawk. Sorkar chuan October 14-a truck bomb puakah khan he pawl hi alo ringhleh tawh a, mah se Al-Shabab hian an pha thung. Mogadishu-ah tho hian kar hnih liamta khan truck bomb puak avangin mi 350 laiin nunna an lo chan phah tawh bawk a ni.

Inrinnia bomb puak leh a hnua inkahna thlen zui vanga thi zingah hian chhungkaw nu ber leh a fate pathum an tel a, an vai hian an lu-ah kah an nih thu, Somali Police chuan an tarlang.