US embassy beia puhna Cuba-in pha
US chuan Cuba-a an embassy-a hnathawkte an dam loh fo chungchangah Cuba sorkar chu mawhphurtuah puhin, mihring hriselna atana ṭha lo 'sonic attack' hmang ruhah a puh. Mahse he puhna hi Cuba chuan a pha thung.
Cuban Foreign Minister Bruno Rodriguez chuan Inrinni khan thuchhuah siamin US-in a puhna chu thil pawm theih loh leh thil ni thei lo a nih thu a sawi. Hetianga inpuhna hian ram pahnih inkarah boruak ṭha lo zawk a chawh chhuah theih thu sawiin, ''Sonic-attack hmanga min puhna hi thu dik lo hulhual a ni" a ti. Bruno Rodriguez chuan polictics-a inbeihna niin ram pahnih inkar tichhe thei thil a nia, a pawihle a ni, a ti.
November 2016 aṭanga August 2017 inkar khan Cuba-a US palai awm 24 vel chuan an taksa hriselna lamah harsatna an tawk a, hei hi US chuan Cuba sorkarin a beihnaah a ngai a ni. He thilah hian Trump chu October thla khan Cuba chu mawhphurtu a nih thu alo sawi tawh a, hemi ṭum pawh hian Cuba sorkar chuan nasa takin alo pha tawh a ni.
Cold War hnu kum 50 dawnah US leh Cuba-te hian inkungkaihna ṭha an nei leh ṭan chauh a, mahse hetianga inpuhna a awm tak avang hian kum 2015 aṭanga an thawhho lehna chuan a tuar thei dawn a ni. Rodriguez chuan ram US hian tunhnaiah Cuba-a palai a dah chanve aia tam mah a ko kir tawh a, Cuban palai 15-te chu Washington aṭangin a lo haw tir tawh bawk a ni, tiin an inkar ṭhat loh thu a sawi.
Cuba chuan US laka ṭhat an chhuah thu leh FBI-te pawh thil chhuichiang turin vawi thum lai kuminah ringawt pawh an ramah an luhtir tawh thu a sawi a. Cuba mite hnena US chuan visa a pe duh lo niin a sawi bawk.
Cuban investigation team doctor Manuel Villar chuan, US-in a ram palai dam lo ni a a sawite medical record a hmuh duh loh thu leh an hriselna lamah harsatna an tawk ngei a ni tih finfiahna a awm loh thu a sawi ve bawk.