Europe-ah Thli na tak tleh vangin mi 5 thi

Europe khawmualpui laili hmun ṭhenkhat leh hmar lamaah Pathianni khan thli na tak a tleh a, hei vang hian Germany, Poland leh Czech Republic-te chuan buai­na tam tak an tawk. He thlipui na tak tleh avang hian nunna chan 5 an awm tawh a ni.

Nunna chan zinga 4 hi chu thing tluin a delh hlum an ni a, pakhat erawh hi chu tui-a tlahlum a ni. Thing tlu avanga thite hi Czec Republic (2) leh Poland (2) mi an ni a, tuia tla hlum erawh hi chu German mi a ni thung.

Poland leh Czec Republic hmun tam takah chuan nimin thleng khan power supply a la mumal lo a, Hamburg, Germany khua pawh tuilian vangin an buai hle bawk.

Germany-a rel service tamtak pawh he thlipui vang hian chawlhtir an ni a, Czech Republic-ah pawh rel service mai bakah kawng tamtak chu kaltlang theih lohin a awm a, Car eng emawzat chu thing tluin a delh chhe bawk. Thli tleh nat zawng hi 100 km/h aia chak a ni a, nunphung a tikhaihlak nasa hle a ni.