Kenya eptu pawl hruaituin inthlan ṭhat leh phut

Kenya ram politics buaina kal zelah eptu pawl hruaitu Raila Odinga chuan inthlanna neih ṭhat leh phutin, kar kalta Ningani a inthlan ṭhat neih chu 'inthlanna lem' a nih thu a sawi.

Odinga chuan President Uhuru Kenyatta kaihhruai pawl chu inthlana dik leh zalen tak neih ṭhat leh a nih theih nana hmala turin a phut a, inbiakna nei tura a inhawn thu a sawi. Nairobi-a thu a sawi naah Odinga chuan, ni 90 hnuah inthlanna neih ṭhat leh a phut thu sawiin, Kenya chu dinhmun hlauhawm takah a dinga ni, a ti.

Kenya-ah hian inthlan duh lo pawl-te'n buaina an chawh chhuah vangin police kutah mi 8 an thi tawh a, he inthlanna an neih hi eptu pawl lam chuan an pawm duh lo a ni.

August 8 khan Kenya hian inthlanna a lo hmachhawn tawh a, eptu pawl lamin inthlan a gfel fai tawk lo tia Supreme Court-a an zualko avangin, an inthlang

ṭha leh a ni. Ni 90 hnu, Ningani a inthlanna an neih ṭhat hma lawk khan eptu pawl leh human activist ṭhenkhat-te'n Kenya chu inthlang ṭha tura a la inpeih loh thu an sawi a, Supreme Court-ah zualko leh bawk. Mahse judge zingah he thubuai ngaihtuah tham an kal loh avangin inthlanna hi kal tlangpui a ni a, hei hi eptu pawl lam chuan nasa taka dodalin, inthlan hi hmun tamtakah an boycott a ni.

Ningania Kenya inthlanna hi venhimna tihchak ni mah se, hmun tamtakah buaina a chhuak nasa hle tho a, polling station ṭhenkhat phei chu an suspend hial a ni. Vote thlak hi report hmasain a tarlan dan chuan 34% pawh a tling lo a, hmun tamatakah eptu pawl hian vote thlak tur an dang tih report chuan a tarlang.

Vote tla zat hi 90% chhiar tawh a ni a, Kenyatta chuan vote maktaduai 7.1 a hmu tawh. Odinga chuan elec­toral commission-te chu vote tla zat hi sawi pungah a puh ve leh thung a, dik tak leh zalen taka inthlanna neih ṭhat leh a ngiat thu a sawi bawk.