April-ah Covid-19 kai thar nitin mi 80,000 an awm

World Health Organisation (WHO) chuan April thla chhung khan chawh­rualin khawvel pumah Covid-19 kai thar nitin mi 80,000 awm zel ang a nih thu a sawi. 

WHO Director-General Tedros Adhanom Ghebreyesus chuan Europe khawthlang lam ramah hri leng hian ziaawm lam a pan ṭan a, hetihlai hian South Asia ram - Pakistan, India leh Bangladesh-ahte chuan zual lam a la pan mek thung a ni, a ti. 

Tedros chuan ram hrang hrangte an ram chhunga hri leng khuahkhirh tuma theihtawp an chhuah rualin, ram dang aṭanga an rama hri lut turte ven dante pawh an ngaihtuah tel a ngai tih a sawi. Hri leng laka invenna tura social distancing leh, dan dang hmante pawh mipuiten an zawm ṭhatna turin zirtirna pek ṭhat an ngai tih a sawi bawk a ni. 

Pakistan-ah Ningani khan Covid-19 kai thar mi 1,764 an awm a, ni khata hri kai an tam ber ni a ni. Pakistan-ah hian hri kai tawh zawng zawng hi mi 25,837 an tling tawh. 

Ningani vek khan he hri vanga thi hi mi 30 an awm tih thuneitute chuan an tarlang a, hri vanga thi hi an vaiin mi 594 an tling tawh a ni. 

Russia ramah coronavirus kai thar chu a zawnin ni ruk chhung nitin mi 10,000 chuang an awm ziah. 

Ningani khan hri kai thar hi mi 10,699 an awm leh a, heng mite nen hian Russia rama Covid-19 kai hi mi 187,859 an tling tawh a, he hri vanga thi mi 1,723 an awm tawh bawk. 

Japan prime minister Shinzo Abe leh US president Donald Trump chu nimin khan Covid-19 hri dona kawngah an thawk dun dawn tih, chief cabinet secretary Yoshihide Suga chuan a sawi.

Suga chuan Abe leh Trump hi minute 45 lai phone hmangin an inbia niin a sawi a, hri leng vanga an ram dinhmun tawn mekte sawi dunin, hri darh zel tur venna atana an hmalak dante an sawi. Hei bakah hian he hri damdawi leh vaccine hmuhchhuah tumna kawnga thawhdun an remti bawk. 

Australia prime minister Scott Morrison chuan an rama Covid-19 hri leng dona atana khuahkhirhna a siam hramg hrangte thlah dul chhoh ṭan a, July thlaaah chuan khuahkhirhma te hlih theih vek a beisei. 

He hri leng vang hian March thla aṭang khan Australia chuan social distancing dan chu khauh takin a kalpui a, ramri khar nghal a ni bawk. Sorkar hmalakna avang hian Australia-a Covid-19 hri kai hian ziaawm lam a pan phah a ni. 

Australia-a Covid-19 hri kai tawh zat hi mi 6,913 an tling tawh a, heng zinga mi 6,074 te chu enkawl dam tawh niin, mi 97 hri vang hian an thi tawh bawk. 

Mexico chuan tun hmaa an ram president chenna atana an hman ṭhin, mahse thil hlu atana an hluihlawn tak Los Pinos complex chu Covid-19 hri dona kawnga hmatawngtu healthcare worker, nurse leh doctor-te chen lailawk nan a buatsaih. 

Los Pinos complex-ah hian health­care worker mi 100 vel an cheng thei dawn tih thuneitute chuan an tarlang a, tunkar tawp aṭanga kar leh chho hian an ramah Covid-19 hri leng hi a nasat zual lai a thleng dawn niin an sawi bawk. 

US leh Canada tih lohah chuan North America-a hri kai tamna ber ram chu Mexico a ni. Mexico-ah hian hri kai hi mi 29,616 an awm tawh a, heng zinga mi 17,781 chu enkawl dam tawh niin, he hri vanga thi hi mi 2,961 an awm tawh bawk a ni.  

US president Donald Trump chuan White House-a thawk pakhatin Covid-19 a kai avangin he hri hi a kai ve em tih nitin test a ni dawn tih a sawi. 

White House-a thawk pakhatin hri a kai tih hriat a nih hnu hian president Donald Trump leh vice president Mike Pence-te chu test ve nghal an ni a, mahse an result hi a negative a ni. Trump chuan hri kai nen hian inkhawih fuhna te an lo nei hman tih sawiin, hei vang hian a test neih tawhna result chu negative mah se nitin test an neihsak ziah dawn tih a sawi.