UN agency-in Myanmar ṭhenawm ramte hnenah ngenna siam

United Nations refugee agency chuan Myanmar tualchhung buaina thleng mek avanga tlanchhia, Myanmar mite chu an rama thawn kir tawh lo turin Myanmar ṭhen­awm ramte a ngen.

UN High Commissioner for Refugees (UNHCR) chuan thuchhuah siamin, Myanmar ramah chuan civil mite laka tharum thlawna thleng avang te, Myanmar sipai leh helpawl hrang hrangte inbeihna thleng avangin mipuite chu himna zawngin an ṭhenawm ramahte an tlanchhia a ni, a ti. "Himna zawnga tlanchhiate hi an ramah kir leh tura nawr tur an ni lo," tiin UNHCR assistant high commissioner for protection, Gillian Trigss chuan a sawi.

Triggs chuan nikum Feb­ruary 2021 aṭang khan ram danga himna zawnga tlanchhia, Myanmar mite an rama haw luih tir leh thawnkir an awm thu report awm ṭhin chu UNHCR chuan pawi a ti hle tih sawiin, "Myanmar ṭhenawm ramte hian raltlante hi kum tam tak venhimna leh chhawmdawlna an lo pe tawh ṭhin a, hei hi tihchhunzawm zel turin kan ngen a ni," a ti.

Tun hnaiah Malaysia chuan an rama Myanmar mi tlanchhe lut zinga 150-te chu a thawn kir leh a, an zingah hian navy officer hluite pawh an tel. An thawnkir zinga mi, navy officer Kywa Hla leh a nupui Htay Htay Yee-te chuan Yagon an thlen rualin man an ni nghal nia sawi a ni a, an hrenna hmun erawh hriatchian a ni lo. Malaysia ramah hian Myanmar sipaiten beihpui an thlak hnua tlanchhia, Rohingya Muslim 1,00,000 chuang an awm mek a ni.

Myanmar sipaiten nikum February thlaa civil sorkar thuneihna an hnehchhuh hnuah, tualchhung buaina hi a la chhuak zui reng a ni. Sipai sorkar duh lohna lantirtu zinga mi sing tel chu sipaite hian an man tawh a, mi 2,300 an thi tawh bawk.