Pakistan EC-in PM hlui Imran khan a disqualify

Pakistan election commission chuan an ram prime minister hlui, Imran Khan chu eirukna thila inhnamhnawiha puhin, Parliament member a nihna aṭangin a hnawl.

Imran Khan-a party, Pakistan Tehreek-e-Insaf (PTI) chuan election commi­ssion thutlukna hi an pawm lo tih sawi nghalin, Islama­bad High Court-ah appeal an tum a, an party thlawp­tute pawh lungawi lohna lantir turin an chah nghal bawk.

August thla khan Pakis­tan Mulsim League Nawaz chuan Imran Khan lakah thubuai hi thehlutin, PM hlui hian ramdang palaite hnen aṭanga thilpek a dawnte leh, thilpek a hralhna aṭanga a sum hmuh ṭhenkhat chu Commission-a declaration a thehluhah a tarlang lo niin an puh.

Ram pawn lam aṭanga Khan leh a nupuiin thilpek an dawn zingah hian luxury watch, jewellery, designer handbag leh perfume-te pawh a tel niin Pakistan chanchinbute chuan an tarlang. Sorkar official-te hi thilpek an dawnte hi sawilang vek tura tih an ni a, an thilpek dawn zinga ṭhekhat chu an kawl zui phalsak an ni ṭhin.

PTI senator Syed Ali Zafar chuan, "Election Commi­ssion of Pakistan hi court a ni lo a, hei vang hian tumah disqualify thei tur a ni lo," tiin nimina press confe­rence a neihnaah a sawi.