Israel President-in sorkar siam turin Netanyahu hriattir
Israel Parliament-in ṭangrual sorkar siam tumna chu a pawmsak hnuah, president Reuven Rivlin chuan prime minister Benjamin Netanyahu hnenah ṭangrual sorkar thar siam turin a hriattir.
Likud party hotu leh PM Netanyahu leh Blue and White party hruaitu Benny Gantz-te chuan thuneihna insem a, ṭangrual sorkar din hi an lo remti tawh a ni. Inremna an siam angin party hruaitu pahnihte hian prime minister dinhmun hi an inchelh chhawk dawn a, Netanyahu hian ram hruaitu hna hi chelh hmasain thla 18 chhung a chelh dawn a ni.
President Rivlin chuan Ningani zan khan Netanyahu hnenah hriattirna hi pein, sorkar thar din turin kar hnih chhung hun a pe. Party pahnihte hian chanvo insem dan turah pawh inremna an siam fel vek tawh a, hei vang hian Israel sorkar thar hi karleh chhungin lakluh hman beisei a ni.