Kenya inthlanah Kenyatta bawkin hnehna a chang

Kenya ram inthlanpuiah President ṭanglai Uhuru Kenyatta bawkin hnehna a chang leh. Kar kalta Ningani khan an inthlang a, result hi Thawhṭanni khan puan niin, Kenyatta hi hneh taka thlan tlin a ni.

Independent Electoral and Boundary Commission (IEBC) chairman Wafula Chebukati chuan inthlan result hi puangin, Kenyatta hian vote maktaduai 7.48 hmuin hnehna a chan thu a tarlang. Kenyatta hian vote tla zawng zawng aṭanga 98% hmuin, hnehna hi a chang chiang hle a, chutih laiin a khingpui National Super Alliance (NSA) hruaitu Raila Odinga chuan vote 73,228 chiah a hmu a, hei hi 1% vel chiah a ni.

Eptu pawl hruaitu Odinga leh a pawlte hian inthlan tur hi duh loin an dodal nasa hle a, vote pawh hi a hma ang chuan a tla ṭha ta lo a ni. August 8-a inthlanna an neihah pawh kha Kenyatta hian hnehna a lo chang tawh a, mahse Odinga leh a kaihhruai pawlte hian an ram danpui kalha inthlan kalpuia an puh avangin Kenya Supreme Court chuan inthlang ṭhat leh turin thutlukna a siam a ni. Inthlan ṭhat a nih leh dawn khan NSA chuan inthlan ṭhulh a nih theih nan SC-ah appeal siam leh mah se, thubuai ngaihtuah tham judge an awm loh avangin inthlan hi an kal tlangpui ta zawk a ni.

Chebukati chuan vote tla zawng zawng hi maktaduai 7.62 a nih thu leh vote thi 37,713 a awm thu a sawi a, polling station ṭhenkhata buaina a chhuah avangin vote a tla mumal lo a, a hnua vote a tlak leh tak thona te nen chuan vote tla hi 38.83% a tling phak a ni. Chebukati chuan inthlan hi dik taka kalpui a nih thu a sawi bawk.

Kenyatta pawn dik tak leh ṭha taka inthlan an zo fel thei chu lawmawm a tih thu a sawi.Odinga leh a kaihhruai pawlte chuan inthlanna hi neih ṭhat leh an ngiat a, tunṭumah pawh kha an dodal nasa hle a ni. Eptu pawl lamin inthlan vanga buaina an chawh chhuah avangin mi 8 laiin nunna an chan phah a ni.