South Korea leh China inbe dawn

South Korea President Moon Jae-in leh Chinese President Xi Jingpin-te chuan karleh hian inbiakna an nei dawn tih, Seoul lam official-te chuan an tarlang.

SKorea leh China hian tunhnaiah inhmuh thiam lohna lian tak an nei a, SKorea hian US missile-defence system chu a ram venhim nan dah a tum a, hei hi China chuan a duh lo hle thung. SKorea chuan North Korea laka invenna atana dah a nih tur thu sawi mah se, China chuan hei hi a ram tan hlauhawmah ngaiin S. Korea thil tih tum dan hi a do nasa hle a ni.

Karleh maia Moon leh Jingpin inhmu tur pawh hian hemi chungchang hi an sawi dawn a, chumi bakah ram pahnin inkara inhriattiam lohna lian tak awm chu chinfel dan zawn an tum. Tunhmaa an dinhmun anga an din leh theih nan inbiakna hi an nei dawn ani tih S. korea official-te chuan an tarlang.

He inbiakna hi Viet­nam-a annual regional forum neih tur rem-chang­ah hmangin an nei dawn a ni.

May thlaa Moon-a'n SKorea-a thuneihna a chan hnuah Jingpin nen hian an vawi hnih inbiakna tur a ni a, G-20 Summit, Germany-a neihah khan inkawmna hun an lo nei tawh bawk a ni.

Ram pahnih inkara inhriatthiam lohna awm hian ziaawm lam a pan tih official-te chuan an tarlang bawk a, Jingpin pawhin Moon nena an inkara inhriatthiam lohna awm te sawi dun tura a inhawn thu a sawi bawk.

NKorea hian SKorea hi nuclear leh missile hmangin a tiphawkleh hle a, chutih laiin China leh NKorea hi sumdawnna lamah ṭhian ṭha tak an ni ve thung.