Israel-in Gaza leiverh a beihnaah Palestinian mi 7 thi
Israel-in Gaza strip chhim lama leiverh pakhat an beihnaah Palestina mi 7-in nunna an chan.
Gaza Ministry of Health thupuangtu Ashraf al-Qidra chuan Khan Tounis area-ah pawh hiam tuar midang 9 awm thu a sawi a, al-Aqsa damdawiinah enkawl tura hruai an ni, a ti. Health Ministry chuan thi zinga 5 hi al-Quds Brigade member an ni tih a puang tawh a, midang pahnih hi chu Hamas' Izz Eddine al-Qussam Brigade member an ni ve thung. Health ministry chuan mi tamak chin hriat loha an la awm avangin mitthi zat hi an la pun belh a rin thu a tarlang bawk.
Islamic Jihad chuan he inbeihna hi an chhan let ngei tur thu an chhuah ve nghal a, Israel sorkar chu fimkhur tura chahin an mite venhimna kawnga nasa zawka hma an lak tur thu a sawi bawk a ni.
Gaza-a roreltu Hamas chuan Gaza mipuite do na a ni, a ti. Palestina media-te chuan he leiverh hi Israle air force-te'n missile hmanga an beih thu an tarlang a, missile 5 lai he leiverhah beih nan hian an hman thu an tarlang a ni. Israel sorkar chuan he leiverh hi hun eng emaw chen a zirchian hnuah an tihchhiat thu an sawi ve bawk.
Tun ṭum hi kum 2008 hnu lama Israel-in Gaza Strip a beih vawi thumna a ni. 2014 kuma code-named Operation Protective Edge an kalpui ṭum khan Palestinian 2,200 aia tamin nunna an lo chan tawh bawk.