CPC hruaitu term 3-na atan Xi Jinping thlang leh

China-a rorellai, Communist Party of China (CPC) 20th National Congress chu zawhfel a ni a, China president Xi Jinping chu CPC hruaitu term thumna chelh turin thlan tlin leh a ni.

Kar khat awh CPC National Congress hi Inrinni liam ta khan zawhfel niin, nimin khan Central Committee hian hruaitu thar turte an thlang a ni. Kum 69 mi, President Xi hi kum nga term, party general secretary atan thlang nawn lehin, CPC Central Military Commission chairman atan ruat a ni nghal bawk. Xi kaihhruai Politburo Standing Committee (PSC) member pasarih pawh puan nghal an ni a, PSC member tharte hi Xi thawhpui hnai tak vek an ni.

CPC hruaitu atana a ṭum thumna atana thlan, President Xi hi nakkum March thlaa legislative session neih hunah China President atan puan a ni dawn a, President term thumna a chelhna tur a ni. Kum 1976-a thi, communist-era leader hmasa ber, Mao Zedong dawta kum 69 mi, Xi hi party hotu thiltithei bera ngaih a ni tawh.

Rorellai party hotu thar atana thlan nawn a nih leh hnua chanchinthar lakhawmtute a kawmnaah, Xi Jinping chuan khawvelin China a mamawh tih a sawi. "China chu khawvel tel loin hma a sawn thei lo a, chutiang bawkin khawvel pawhin China hi a mamawh a ni," a ti.

An party leh ram mipuite a chungah rinna an nghah ang ngeiin theihtawpa thawh zel a tum tih a sawi.