Pakistan PM hlui lakah tualthah tuma puhna thubuai thehluh

Pakistan prime minister hlui Imran Khan laka tualthah tuma puhna thubuai thehluh a ni.

Kumin March thlaa Prime Minister a nihna aṭanga paih­thlak, Pakistan Tehreek-e-Insak hruaitu lakah hian PML-N leader Moshin Shahnawaz Ranjha chuan Inrinni liam ta khan thubuai hi a thehlut a ni. He thubuai a thehluh hma ni hian Ranjha hi Election Commi­­sison of Pakistan (ECP) office kawtah, PTI thlawptuten nawrh an huaihawtna hmunah beih a ni.

Islamabad-a Secretariat police station-ah thubuai hi thehlutin, Ranjah chuan Tosakhana case chungchanga ECP-a a inlan tur chu PTI thlawp­tute hian an hotupa thupek angin thah ngei tumin an bei niin a sawi. Hei bakah hian PTI hotu thupek bawkin Sri Nagar Highway chu party worker-ten an dang tih a sawi bawk.

PTI worker-ten nawrh an huaihawtnaa tharum thawhna thleng vangin Imran Khan, party secretary-general Asad Umar leh party worker 100 vel lakah firfiak zawnga che a puhna kaihhnawih thubuai siamsak an lo ni tawh bawk a ni.

Imran Khan hi PM a nih laia ram dang palaite hnen aṭanga thilpek a dawnte dan loa hralh chawng leha puhnaa thiam loh chantir a ni a, hei vang hian kar liamta Zirtawpni khan Election Commission chuan politics a khelh zui a khapsak bawk.