Italy Prime Minister thar Giorgia Meloni lalut

Italy ramin hmeichhe prime minister a neih hmasa ber, hard-right leader Giorgia Meloni chu Inrinni khan rinawmna thu tiamtira lakluh a ni.

Kum 45 mi, Giorgia Meloni kaihhruai Brothers of Italy party hian September thlaa inthlanpui an neihah khan vote 25% chuang a hmu a ni. Matteo Salvini kaihhruai League party leh, PM hlui Silvio Berlusconi party Forza Italia nen ṭangrual sorkar an siam a ni.

PM thar lakluh rual hian a cabinet minister 24 te pawh lakluh nghal niin, an zingah hmeichhia paruk an tel. Sorkar thar hian tunkarah Parliament-ah fiahna a hmachhawn nghal ang. Parliament chamber pahnihah fiahna an paltlang hunah sorkar hian thuneihna pumhlum a nei thei chauh dawn a ni. Meloni hian deputy prime minister pahnih Forza Italia deputy leader Antonio Tajani leh interior minister hlui Salvini-te a ruat bawk.

Hard-right leader, Giogria Meloni hi Catholic Kristian leh conservative tia insawi a ni a, 'Pathian, an ram leh chhungkua' venhim zel a tum tih a sawi. Nau tihtlak, damdawia chiuhlum phalna, mahni anpui inneih leh anpui neiten fa an neih dodal tlattu niin, mahni anpui kawpten fa an lak (adopt) khap a nih theihna tura an ram danpui siamṭhat thlawptu a ni a, an rama ramdang mi pemlut ṭhinte pawh dan duhtu a ni bawk.