Iran-in Russia-ah Gas turbine 40 thawn dawn

Iran chuan Russia rama gas turbine 40 thawnna tur contract a ziak fel tih Iran oil ministry hnuaia Shana News Agency chuan a tarlang.

Iran gas engineering and development company hotu, Reza Noshadi chuan an ramin gas equipment leh facility an mamawh zinga 85% chu an nei thei tawh tih sawiin, US-in hrekna na tak a siam chungin an gas siamchhuah chu a letin a pung tih a sawi bawk.

Russia leh Iran hian field hrang hrangah an thawhdunna hi tun hnaiah an tilian chho zel a ni. July thla khan ram pahnihte hian memorandum of understanding ziakin, Russia chuan Iran petroleum industry-ah USD tluklehdingawn 40 vel a invest ang. July thla vek khan Central Bank of Iran governor Ali Salehabadi chuan Tehran Stock Exchange-in rial-ruble trading a hawn thu a lo puang tawh bawk. Ram pahnihte hian insumdawn tawnna atana an ram pawisa hmanna tur siamchhoh pawh an tum bawk.

Russia foreign minister Sergei Lavroc chuan ram pahnihten inlaichinan leh thawhdunna ṭha chho zel chu a lungawi thlak thu sawiin, thawhdunna zau leh lian zawk siam zel an tum thu pawh a lo sawi tawh a ni.

Russia hian Ukraine ram a beihnaah Iran siam drone a hmang niin Ukraine leh khawthlang ramte chuan an puh a, nimin khan Britain defence ministry chuan Russia hi Iran siam unscrewed aerial vehicles (UAV) hmangah a puh nawn leh bawk.

Ukraine-in Russia puhna a hnawl
Russia chuan indona thleng mekah, Ukraine chu radioactive material nena thuam, 'dirty bomb' hman tumin a inbuatsaih mek niin a puh a, mahse Russia puhna hi Ukraine ram bakah US, Britain leh France-te chuan an hnawl.

Russia defence minister Sergei Shoigu chuan Pathiannia UK defence minister Ben Wallace nena an inbiaknaah 'dirty bomb' chungchang hi a sawichhuak a ni.

Ukraine president Volo­dymyr Zelenksyy chuan Russia puhna chu hnawlin, an ngaihtuah phak bak thil tenawm tak tak duang chhuak­ah Russia chu a puh let.