Korea ram pahnihten warning shot kapchhuak ve ve
North leh South Korea ramte chuan nimin zing khan tuipui lama an inrina bulah warning-na ralthuam an hmetpuak ve ve.
South Korea navy-te chuan zing dar 3.42 vel khan an tuipui china lut nia an sawi, North Korea sumdawng lawnglian warning nan silai an hmetpuak tih Joint Chiefs of staff thuchhuah chuan a tarlang.
Hetih lai hian North Korea sipaite pawhin an coastal defence unit-te chuan an tuipui chinah an hmelmate lawng chevel hmuh a nih avangin warning nan artillery shell 10 an kapchhuak tih an sawi ve bawk. South Korea navy lawnglian chu North Korea tuipui china lutah an puh.
Korea ram pahnihte hian warning shot hi kapchhuak ve ve mah se, sipaite erawh an inbei zui lo nia sawi a ni.
Tun hnaiah Korea ram pahnihte hi an inep zual leh a, South Korea sipaiten kar liamta aṭanga annual Hoguk defence drill an neih leh, US leh Japan nena joint drill an neih chuan NKorea hi a tithinur hle a ni. Hoguk defence drill hi October 28 thleng an nei dawn a, he programme hnuaiah South Korea naval force-te chuan tuipuiah ni li chhung exercise an nei dawn tih sawiin, hetah hian indo lawng 20 vel an hmang dawn tih an sawi. NKorea chuan drill an neih hi an ram do tuma an inbuatsaihna niin a puh a ni.