Britain Prime Minister thar Rishi Sunak

Britain-a rorellai, Conservative party hruaitu thar tur inchuhnaah Indian-origin, Rishi Sunak chu a tling a, Britain prime minister thar atan King Charles III chuan nimin khan a ruat.

Thawhṭannia Tory hruaitu thar tur inchuhnaah MP 150 dawnin Sunak hi an thlawp laiin, a khingpui Penny Mordaunt chu MP 30 chauhin an thlawp thung a ni. Party hruaitu tura thlan a nih thu puan a nih hnuah, Sunak chuan an party leh Britain ram inpumkhatna siam chu a ngaih pawimawh ber a ni dawn tih a sawi.

Kum 42 mi, multimillionaire Sunak hi British Asian prime minister hmasa ber a ni a, kum 200 chuang hnuah Britain Prime Minister ni thei naupang ber a ni bawk.

Hindu ruh tak, Sunak hian ni 44 chhung chauh PM dinhmun chelh a, banna thehluttu Liz Truss-i a thlak a, thla hnih chhunga Britain PM pathumna a ni.

Finance minister hlui, Sunak hian an ram economy dinhmun tlahniam mek avangin hmabak hautak tak a hmachhawn nghal dawn a ni.

Nimin khan Britain lal, King Charles III-in Buckingham Palace-ah Sunak hi PM atan ruatin, hemi hnu hian 10 Downing Street-ah thu a sawi nghal a ni. Sunak hian a cabinet minister turte a thlang nghal ang.

Britain Prime Minister thar, Sunak nu leh pate hi Indian thlah East Africa-ah an pem a, kum 1960 chhoah khan UK-ah an pem lut a ni. Sunak nupui, Akshata Murty hi Indian tech giant, Infosys dintu, billionaire Naryana Murthy fanu a ni.