Myanmar sipaite bomb thlak vangin mi 80 thi tawh

Myanmar sipaiten an ram hmar lam, Kachin state-a thlawhtheihna hmanga bomb an thlaknaah mi 80 chuang an thi tawh a, human rights pawlte chuan sipai general-te chu laws of war bawhchhiaah puhin, ramdangte chu Myanmar sipaite tana ralthuam leh thlawhtheihna fuel hralhchhuah khapna tichhuak turin a ngen.

Pathiannia Kachin Independence Organi­sation dinchampha lawm tura mi za tel pungkhawmte chu bomb hmang hian beih an ni a, February 2021-a Myanmar sipaiten thuneihna an chan hnua inbeihna rapthlak ber tia sawi a ni.

He inbeihnaah hian mi 80 aia tlem lo an thih bakah, 100 chuangin hliam an tuar niin Kachin Artists Association chuan Thawhṭanni khan a puang.

Military aircraft hian Pathianni tlaia intihhlimna hun an hmanna, mi 300-500 bawr vel punkhawmnaah bomb pali an thlak a ni. Thi zingah hian Kachin military officer leh sipai, musician, lunghlu laihchhuahna lama sumdawng, civil mi te leh, backstage lama eirawngbawltute pawh an tel.

Kachin News Group tarlan danin hliam tuar, inbeihna thlenna bul hnaia damdawi-ina enkawl­na dawng tura kalte chu sipaiten an lo dang tih a sawi. Amnesty Inter­national chuan hliam tuarte chu enkawlna leh chhawmdawlna pe turin a sipaite a hriattir.