Israel sipaiten Palestinian 6 an kaphlum
Israel sipaiten West Bank-a hel an dapnaah Palestinian mite nen an inbeihnaah mi paruk an kaphlum a, mi dang 21 an kap hliam bawk niin Palestinian official-te chuan an sawi.
Nimin zing khan Nablus khawpuiah Israel sipaite hi lutin, tun hnaia pawl din tar Lion's Den group mi leh sate an dap a ni. He pawl hian tun thla tir khan Israel sipai pakhat an lo kaphlum tawh a ni.
Israel defence force (IDF) chuan kar hnih liam ta aṭang khan staff sergeant Ido Baruch kaphlumtu hi Nablus khawpuiah hian lo zawng tawh a ni. Nimin zing hma takah sipai ṭhahnem tak chuan khawpui hi lutchilhin, Lion's Den pawl headquarters leh bomb siamna factory-te an dap niin an sawi.
Palestinian mite chuan Israel sipaite an luh hnu hian loudspeaker hmangin tualchhung mite chu kalchhuak a, an khawpui venghim turin an au a, ṭhalai tam tak an chhuakkhawm nghal a ni. Hemi hnu hian Israel sipaite leh Palestinian mite hi inkap zuiin, Palestinian mi panga kahhlum an ni.
Nimin vek khan Nablus khawpuia Israel sipai lut duh lohna lantirin Nabi Saleh-ah Palestinian mite chuan Israel sipaite chu lungin an tawng a, sipaite hian kap letin Palestinian mi pakhat an kaphlum bawk.