New York-a pawikhawihna thlengah mi pariat thi

New York-a Lower Manhattan-ah Thawhlehni tlai khan truck driver pakhatin cycle path-a kalte a pawng chil a, mi pariat an thi a, midang 11-in hliam an tuar.

Pawikhawihtu hi police officer pakhatin kapfuhin, a hnuah an man zui nghal a ni. Truck driver hi kum 29 mi, Sayfullo Saipov a ni a, kum 2010-a US-a pem lut nia sawi a ni. A truck-ah hian lehkha, Islamic State (IS) firfiak pawl chungchang inziahna lehkha hmuh a ni. He pawikhawina thlenna hmun hi World Trade Center bul a ni.

New York Mayor Bill de Blasio chuan press conference-ah, pawikhawihna thleng hi firfiaka chetna, civil mi pawisawilote beihna a nih thu a sawi.

City Police Commisioner James O'Neil chuan truck khalhtu hian Thawhlehni tlai dar 3:05 khan a truck hman hawh chu West Side Highway bicycle path-ah khalhin, chhim lam hawiin a tlanpui a, he kawnga ke kalte leh bicycle khalhte chu a pawng chil a ni. Chambers Street-ah truck hi school bus nen a insu zui a, mi paliin hliam an tuar a, an zingah hian naupang pahnih an tel. School bus nena an insut hnuah driver hi motor aṭanga chhuakin pellet gun a keng a, mahse a bul hnaia police officer awm chuan a dulah lo kap fuhin, damdawi-inah kalpui nghal a ni.

Truck driver hian pawikhawihna a thlen lai hian Arabic-in 'Allahu Akbar' (Pathian chu a ropui a ni) tiin a au nia sawi a ni.

New York khawpuia pawikhawihna a thlen hnu hian President Donald Trump chuan Homeland Security Department chu venhimna khauh zawka kalpui turin a hriattir nghal a ni. President chuan firfiaka chetna thlenga thi chhungte leh hliam tuarte a tawrhpui thu a sawi a, pawikhawihnaa inhnamhnawihte chu manchhuah ngei an nih tur thu a sawi.