Japan PM atan Abe thlang nawn

October 22-a Japan Parliament lower house inthlanna neih takah, Prime Minister Shinzo Abe-a kaihhruai Liberal Democratic Party chuan hnehna a chang a, nimin khan Abe chu Prime Minister atan thlan nawn a nih thu puan a ni.

Kum 63 mi, Shinzo Abe hi kum 2012 December thla khan a ṭum khatna atan Prime Minister-ah thlan a lo ni tawh a ni.

Parliament inthlan neih dawn hian Abe chuan an ram economy dinhmun siamṭhat leh defence lam thuamchakte a tiam a ni. Inthlanpui neih zawh takah hian Liberal Democratic Party kaihhruai ṭangrual pawl chuan seat hmun thuma ṭhena hmun hnih lain, super majority an nei pha a ni.

Abe hian a cabinet minister ngaite a ruat leh rin a ni a, extra budget siam tura hrilhin, child care leh productivity lam thlurbing turin a ti a ni.

US President Donald Trump chuan November 5-7 hian Japan a tlawh dawn a, Thawhṭanni khan Abe hi telephone-a biain, a zin tur hi a nghahhlelh tawh thu leh, North Korea nuclear leh missile programma kalpui mek chungchang dolet tura thawhdunna ṭha tak neih a duh thute an sawi a ni. Ram hruaitu pahnihte hian golf khelh dunte an tum bawk.