Myanmar-in Bangladesh dem

Myanmar sorkar chuan Bangladesh aṭanga Rohingya raltlante Myanmar rama thawnlet tur tikhawtlaiah Bangladesh a puh.

Myanmar-a Rakhine state-a tualchhung buaina a chhuah hnuah, August thla aṭang khan Rohingya Muslim nuai ruk chuang zet chu Bangladesh ramah hian an tlanchhe tawh a ni. UN leh ram hrang hrangte nawrna avangin Myanmar sorkar chuan Rohingya raltlante lakkir hi a remti a, mahse an lakkir turte hi uluk taka enfiah vek a tum a ni.

Myanmar sorkar thupuangtu, Zaw Htay chuan raltlante lakkir leh an remtih thu an puan vek hnuah, Bangladesh sorkar chuan hma lak tumna chu a tikhawtlai zel niin a sawi. Bangladesh sorkar hian August 25 aṭanga an rama Rohingya raltlan lut official list chu a la thawn duh lo niin a sawi.

Bangladesh hian raltlante chhawmdawlna tur hian dollar maktaduai 400 zet a dawng a, sum tam tham tak a dawn avangin raltlante thawnkir tur hun pawh hi a tihkhawtlai phah nia an ngaih thu, Myanmar sorkar thupuangtu chuan a sawi.

Myanmar sorkar chuan Rohingya raltlan hruaikir turte chu Rakhine state-a lo awm nghet tawh ngei a ni tih finfiahna an neih a phut a ni. Sorkar hian Rohingya te hi a khua leh tui anga a la pawm lo a, Bengali angah chhiarin hemi pawmtute chu ID card a pe a ni.

Rakhine state chhungah Myanmar sorkar chuan National Verification card pekchhuah hna a kalpui mek a, Bengali-a chhiar pawmtute hnenah he card hi pein, card pekte hnenah hian a thlawnin ei tur leh thosilen te sem a ni bawk.