Israel official meeting neihpui vangin UK minister bang

United Kingdom international development secretary, Priti Patel chu Israel-a a zin ṭuma Israel official-te a ruka meeting a neihpui avangin a bang.

Kum 45 mi, Patel-i hi he thil avang hian Africa-a zin lai chu Nilaini khan UK-ah koh kir a ni a, Uganada-a a tlawh tur pawh a ṭhulh phah a ni. Patel-i hi August thla khan Israel-ah chawlh hmangin a zin a, a cham chhung hian an ram hruaitute hrilh loin Israel official-te meeting ṭum 12 a neihpui a, heng zingah hian Israel Prime Minister Benjamin Netanyahu pawh a tel. Meeting neih tur hi Foreign office lam a hriattir lawk loh vangin ministerial code a bawhchhia a ni.

Israel-ah hian Patel-i hi ni 13 a cham a, a haw hnuah Golan Heights-a Israel sipaite chhawmdawlna tur sum pek a duh thu pawh a sawichhuak a ni. Patel-i hian Setpember 7 khan British Parliament-ah Israel public security minister Gilad Erdan hmuin, September 18 khan New York-ah Israel foreign official Yuval Rotem a hmu bawk.

Israel official-te a ruka meeting a neihpui thu hriatchhuah a nih hnuah Patel-i hian banna lehkha a thehlut nghal a, meeting a neih chungchang hi Prime Minister Theresa May emaw, Foreign Secretary Boris Johnson emaw a hrilh loh avangin thupha a chawi nghal bawk.

Patel-i hi kar khat chhunga second cabinet-level minister bang pahnihna a ni a, a hma hian mipat hmeichhiat lam hawia a hmingchhiat avangin Michael Fallon chu defence secretary aṭangin alo bang tawh bawk a ni.

Prime Minister Theresa May-i chuan Patel-i banna a thehluh chungchang a chhannaah, Israel leh UK chu thawhdunna ṭha tak nei a nih thu a sawi a, mahse ram pahnih inkar thil chu dan ang taka kalpui zel a ngai a ni, a ti. Patel-in thupha a chawi chu lawmawm a tih thu a sawi bawk.

Priti Patel-i hi Indian-origin MP zinga cabinet-level post chelh thei hmasa ber a ni. A nu leh pa hi Gujarat mi niin, kum 1970 chho khan Uganda aṭangin Britain-ah an pem lut a ni. Kum 2010 khan House of Commons member atan thlan tlin a ni.