Zimbabwe vice president hlui tlanchhia

Zimbabwe President Robert Mugabe-an a vice president aṭanga a ban tak, Emmerson Mnang-agwa chuan thaha vauna a tawh avangin ramdangah himna zawngin a tlanchhia.

Kum 93 mi, Mugabe hian a vice president hi a lak aṭanga thuneihna chhuhsak tuma phiarruah puhin Thawhṭanni khan a ban a ni. Mugabe chuan a thih hun tur hriat duhin Mnangagwa hian zawlneite a hmu a, mahse zawlneite chuan Mugabe aia a thih hmasak tur thu an lo hrilh a ni, a ti. Mnangagwa hi Mugabe-a thlaktu tura rinkai ber a ni a, mahse ban a nih tak avangin President thlaktu tura beiseiawm ber chu Mubage-a nupui, First Lady Grace Mugabe a ni ta a ni. Grace-i hian vice president ban tur hian a pasal hi a lo nawr fo tawh nia sawi a ni bawk.

Nilaini khan rorellai Zanu-PF chuan Mnangagwa hi an party aṭangin an hnawhchhuak ve leh nghal a ni.

Hetih lai hian Mnangagwa chuan Mugabe-an a puhna hi thu dik lo anih thu sawiin, Mugabe lakah a rinawm reng tih a sawi thung. A kalna ram hi tarlan a ni lo a, mahse Mnangagwa chuan Zimbabwe ramah kir leh a, Zimbabwe ram hruai a la tum tih a sawi. Zanu-PF official-te chu Mugabe leh a nupuiin an party an duhdan anga thunun phalsakah a puh bawk.