Suu Kyi-in Rakhine state a tlawh

Myanmar hruaitu, Aung San Suu Kyi-i chuan tualchhung buaina thlen mekna, Rakhine state chu nimin khan a tlawh. August thlaa buaina a chhuah hnua a tlawh hmasakna ber a ni.

Suu Kyi-i hian regio­nal captial Sittwe leh khaw dangte chu a tlawh kual a, a kal tur thu hi puanzar lawk a ni lo.

Rakhine state-a Myanmar sipaiten beihpui an thlak avangin Rohingya Muslim-ten har­satna nasa tak an tawk mek a, mi nuai tel chu Bangladesh ramah an tlanchhe tawh a ni. Rohingya-te tawrhna thleng mek chungchangah aw a chhuah mai loh avang leh, sipaite dang tura hma a lak loh avangin Suu Kyi-i hian sawisel a tawk fo a ni.

Myamar sipaite chuan beihpui an thlaknaah security force-te beitu, Rohingya helte chauh an bitum niin an sawi a, mahse ram dangte chuan sipaite hi Myamar sorkarin foreigner anga a ngaih, Rohingya te thenfaina remchanga hmangah an puh thung.

Suu Kyi-i hian Rohingya te chungchanga dem a hlawh mek laiin, tunhnaiah Rakhine-a tualchhung buaina thleng mek chinfelna tur ruahmanna thar a puang a, hei bakah hian Rakhine state-a hmasawnna kalpui dan turte a lo sawi tawh a ni. Hmasawnna hna hi sorkar laipui, tualchhunga sumdawng pawl leh foreign donor-te nen an thawkho dawn niin a sawi. Hetih lai hian buaina chhuahna huam chhungah hian international aid agency-te chu an duh anga chet lak phalsak an la ni lo thung.

Myanmar sorkar chuan Bang­ladesh-a tlanchhia, Rohingya raltlante hruaikir leh a remtih thu a sawi a, mahse raltlante hruaikir dan tur chungchangah Bangladesh sorkar nen inremna an la siam fel lo.