CIA-in Bin Laden-a file tlangzarh

US-a Central Intelli­gence Agency (CIA) chuan kum 2011-a al-Qaida firfiak pawl hotu, Osama bin Laden beih leh thah a nih tuma file a mante chu a tlangzarh. File tlangzarh hi 470,000 dawn a tling.

CIA in file a tlangzarh zingah hian Bin Laden-a personal diary, document, audio leh video file te a tel a, hei bakah hian a fapa Hamza-a inneih video clip te pawh a tel. Hei hi CIA-in Pakistan-a Abbottabad-a Bin Laden-a in an beihna an thil man an tlangzarh ṭum li-na a ni. Hmanrua an man ṭhenkhat erawh chu ram himna khawih pawi thei thil a nih avangin thup rih a ni.

CIA Director Mike Pompeo chuan thu­chhuah siamin, al-Qaida letter, video, audio file leh hmanraw dang an tlangzarh aṭang hian America mipuite chuan firfiak pawl hnathawh leh ruahmanna siam dante chu chiang zawkin an hre thei dawn a ni, a ti.