FARC hotuin Colombia Pre-sident inthlan chuh tum

Colombia helpawl hlui, Fuerzas Armadas Revolu­cionarias de Colombia (FARC) chu sorkar nena inremna an siam hnuah political party angin a ding zui a, FARC hruaitu Rodrigo Londono chuan kum 2018-a Colombia president thlanna neih turah chuh a tum tih a puang. Rodrigoa Londono hi Timochenko tia hriat lar a ni a, kum 58 mi niin kum 2011 aṭang khan FARC hruaitu hna hi a chelh tawh a ni. Nikum khan FARC leh Colombia sorkar hian inremna an siam a ni.

Sorkar nena inremna an siam hmain FARC hi kum sawmnga chuang zet an hel hman a, hemi chhung hian mi 260,000 chuang an thi a ni. Nikuma sorkar nena inremna an siamah, FARC member-te chu jail-a tantir lo a, politics an khelh zui nghal phalsak ani a, hei hi right-wing party te chuan an sawisel nasa hle. Mipui ngaihdan lakah pawh mi tam zawk chuan FARC te chu inremna thuthlung an siamte an zawm ngei dawn em tih rinhar an la tih thu an sawi.

Inremna siam hmaa hel pawl, Revolutionary Armed Forces of Colombia chu political party anga ding zuiin, Revolutionary Alternative Force of the Common People tih a ni zui a ni.

Colombia President thlan thawh khatna hi May 27, 2018 hian neih a ni dawn a, President ṭanglai Juan Manuel Santos chuan chuh a tum tawh lo a ni. FARC hian House of Representative leh Senate inthlan neih turah pawh candidate siam a tum a ni.