New York-a pawikhawihtu thubuai siamsak

New York khawpuia truck hmanga mi pawng chiltu, Sayfullo Saipov chu thubuai siamsak a ni a, Islamic State (IS) firfiak pawl tana hmanruate supply ṭhinah puh a ni bawk.

Kum 29 mi, Saipov hian Thawhlehni tlai khan Lower Manhattan-a cycle lane-ah truck khalh lutin, ke kalte leh cycle khalhte chu a pawng chil a, mi pariat an thi a, mi 12 in hliam an tuar phah a ni. Saipov hi pawikhawihna a thlen hnuah police officer pakhatin a dulah kap fuhin, damdawi-inah dah nghal a ni.

Saipov chuan a pawikhawihna thleng chu thla hnih liamta aṭang khan alo ruahman lawk tawh niin a sawi. Pawikhawihna thlen hun atan hian khawlaia mi an tam theih hun lai tur, Halloween a thlang tih a sawi bawk.

Cycle lane-a truck a khalh luh dawn hian a motor-ah IS flag tar a tum a, mahse mipuiin an ngaihven a hlauh avangin a ti duh leh ta lo niin a sawi bawk. Man a nih hnuah thuneitute chuan a bungrua an enfiah sak nghal a, a phone-ah IS propaganda video 90 zet hmuh a ni.

New York-a pawikhawih­na thleng kaihhnawih­ah hian Uzbek mi dang pakhat chu thu zawhfiah tura zawn mek a ni bawk.

Sayfullo Saipov hi Tam­pa, Florida-ah a cheng ṭhin a, a hnuah Paterson, New Jersey-ah a insawn a ni. Kum 2010 khan Uzbekistan aṭangin America-ah hian a lut a, dan anga awm theihna pawh a nei a ni. Uber driver-in hun eng emaw chen a thawk tawh bawk.