Italy PM Meloni kaihhruai Sorkarin fiahna a paltlang

Italy prime minister thar, Giorgia Meloni kaihhruai sorkar chuan Nilaini khan Parliament Upper House-ah fiahna a paltlang.

Senate-a sorkar fiahnaah hian Meloni kaihhruai sorkar thlawp lamah vote 115 a tla a, a thlawp lo lamah vote 79 tlain, vote thlak lo panga an awm thung. Majority nei tur hian vote 104 hmuh tlin a ngai a ni.

Thawhlehni khan sorkar hian Parliament Lower House-ah fiahna lo paltlang tawh bawkin, member 235 in sorkar an thlawp a, a thlawp lo lamah vote 154 a tla.

Italy ram danpui hnuaiah sorkar thar hian Parliament in hnihah fiahna hi a paltlang phawt a ngai a ni. Fiahna paltlang hnuah sorkar thar hian dan ang takin hna a thawk thei tawh dawn a ni.

Italy hmeichhe PM ni thei hmasa ber, kum 45 mi Meloni chuan vote lak hma hian a kaihhruai sorkarin hmalak a tumna hrang hrangte sawi hmain, energy man sang zel thunun te, economy chak siam te, Ukraine an thlawpna chhunzawm zel leh, prime minister office thuam chak a nih tur thute a sawi.

September thlaa inthlanpui buatsaihah Meloni kaihhruai, Brothers of Italy party chu party mala vote hmu hnem ber niin, vote tla aṭangin 26% a hmu a, Matteo Salvini kaihhruai League party leh PM hlui Silvio Berlus­coni kaihhruai Forza Italia nen ṭangrual sorkar an din a ni.