Russia-in 'Kamikaze' drone 400 an kapchhuak : Ukraine

Russia leh UKraine inkar boruak ṭang chho leh mek karah, Ukraine president Volodymyr Zelenskyy chuan Nilaini khan an rama civil mite lakah Russia chuan Iran siam 'Kamikaze' drone 400 vel a kapchhuak leh niin a sawi.

President Zelenskyy chuan Iran siam Shahed-136 kamikaze drone 400 vel chu Kyiv leh khawpuia civil mite chen tamna hmunah an kapchhuak tih a sawi.

October 17 khan Russia hian drone 43 hmangin Ukraine lakah beihpui a lo thlak tawh bawk. Khami ni vek khan, Russia sipaite chuan Ukrane beihnan drone 28 an hmang a, mi panga an thih phah tiin The Kyiv Independent report chuan a tarlang.

Iran leh Russia hian thawhdunna ṭha tak an nei a, mahse Iran chuan Russia hnenah ralthuam a thawn loh thu a sawi. Mahse Russia chuan October 17 khan "Kamikaze" drone hmangin Ukraine khawpui Kyiv-a chenna in tam tak a kapchhia a ni. Iran pek drone-te hmanga Ukraine khawpuite beih a ni tia Ukraine-in a puh hnu lawkah, khawthlang ramte chu ralthuam lama chhawmdawlna pe turin a ngiat zui nghal a ni.

Russia-in a awp, Crimea bial leh Russia inkalpawhna lei awmchhun kahchhiat a nih avangin Russia hian nasa zawkin Ukraine lakah hian beihpui a thlak zui a ni. Russia-in Crimea a lak aṭanga kum li a liam hnu, kum 2018 khan Crimean Bridge hi Russia president Vladimir Putin chuan a hawng a, peninsula aṭanga Russia rama mamawh chawkluhna kawng atana ruahman a ni. Km 19-a thui lei dawh hian Kerch Strait aṭangin Crimea leh mainland Russia-te chu a thlunzawm a, railway leh vehicle section tlanna tur hran siamin, kum 2020 aṭang khan hman ṭan a ni.