Iran police-ten Amini thlan bula pungkhawmte kap

Hijab hmang ṭha lo tia Iran police-te man, Mahsa Amini (22) thih dana lungawi lohna chu Iran khawpui hrang hrangah lantir chhunzawm reng a la ni.

Mahsa Amini thih aṭanga a ni 40-na, Nilaini khan an khua Saqqez-a a thlan bulah mi sang tel an pungkhawm leh a, pungkhawmte hi police-te chuan silai leh tear gas hmangin an kap leh a ni. Pungkhawmte hian zalenna an duh thu leh dictator paihthlak an duhthu an aupui. Saqqez leh Kurdistan province hmun dangah nawrh huaihawt tharna a awm leh venthawn thilah Nilaini khan security force tam zawk dah belh an ni.

Amini thih dan chungchanga Iran-a lungawi lohna lantirna hi kum 1979 Iran revolution hnuah an rama nawrh huaihawtna lian ber nia sawi a ni. Nawrh huaihawtnaah hian hmeichhiate chu a hmatawngah awmin, Amini chungah morality police-te chet dan an duh lohna lantirin an lu tuamnate phelhin an hal a, vantlang hmunah an samte an tan bawk.

Norway-a hmunpui nei, Iran Human Righst chuan nawrh huai­hawtnaa tel mi 234-te chu security force-te kutah an thi tawh nia sawiin, an zingah naupang 29 an tel tih an sawi.

Hetih lai hian Iran hruaitute chuan an ramchhunga buaina thleng mek chu ram dang mite chawh chhuahah an puh thung.