Latin America-ah Hri kai an tam ber

Latin America ramah Covid-19 hri leng a hluar belh zel a, Pathianni khan a ṭum khatna atan US leh Canada-a hri kai awm zat aiin Latin America rama hri kai awm zat an tam zawk.  

Brazil, Mexico, Peru, Colombia leh Argentina ramah hri kai an pung thar chak hle a, hei vang hian Latin America bial chu hri lengin a nghawng nat ber a ni chhho mek. Khawvel puma hri kai zat aṭanga 26.83% chu Latin America bial chhunga awm an ni. 

Hetih lai hian US chu ram mala hri kai tamna leh  he hri vanga thi an tamna ber ram a la ni chhunzawm zel.  US-ah hian hri kai hi maktaduai li chuang an awm tawh a, mi nuai 1.4 chuangin an thihpui tawh bawk. Brazil chu hri kai tamna ram pahnihna niin, hri kai hmuh chhuah tawh hi mi maktaduai 2.4 an awm tawh a ni. Nimin thleng khan khawvel pumah hri kai hi 1,61,99,796 awm tawhin an zinga 6,47,910 chuan an thihpui tawh a ni. 

Asia ram hrang hrangah hri lengin ziaawm lam a pan hnuah, hri kai hmuh chhuah thar an awm tam leh ṭan hle. Hei vang hian ram hrang hrangte chuan hri leng thawh hnihna thleng tur lakah invengin, khuahkhirhna te an siam thar leh a ni. 

Hong Kong chuan Nilaini aṭanga hman ṭan turin khuahkhirhna siam belh lehin, restaurant-a thil eite a khap dawn a, pawn chhuakte tan mask vuah ngei ngei tur a ti bawk. Australia sorkar chuan chhimchhak lam, Victoria state-a kar ruk chhung lockdown a puan chu a pawtsei dawn nia sawi a ni. Australia ram chhung hmun tam zawk hi hri lakah hian fihlim mah se, chhimchhak lama state pahnihah hri leng hi a hluar hle thung. 

Japan sorkar chuan sumdawnna hmun hrang hranga thawktu zinga hri kai hmuh an awm belh zel avangin, heng hmunahte hian social distancing dan khauh taka kengkawh tur leh, telecommuting lam uar zawk turin a hriattir bawk a ni. Vietnam ram chuan Danang khuaah hri kai pathum hmuh thar an awm avangin he khuaa khualzin awm mek, mi 80,000-te chu a hruai chhuak. 

Philippine pawhin hri leng darh tur venna atan khuahkhirhna khauh zawka kalpui a ngai dawn em tih a ngaihtuah mek. North Korea-ah hri kai hmasa ber hmuh chhuah a nih avangin emergency puan a ni a, hri kai awmna Kaesong khuaah lockdown a puang tawh bawk. 

Nimin khan China ramah Covid-19 kai thar mi 61 an awm a, hei hi April thla hnua China rama hri kai hmuh tam ber ni a ni. China-a region pathumah chuan hri hi a darh chhuah leh an hlau bawk.

Hri kai hmuh thar zinga mi 57 chu Xinjiang region hmarthlang lama chengte an ni a, Xinjiang region khawpui Urumqi-ah hian July thla laihawl khan hri kai thar an awm leh nual thu China National Health Commission chuan a tarlang. Hri kai thar dang pali hi ram dang aṭanga China lut an ni.

Kar liam ta khan Liao­ning province hmar­chhak lama awm Dalian khuaah hri kai thar mi 14 hmuh chhuah a ni a, he khuaah hian mi 100 chuang test neihpui nghal a ni. July 1 khan Chinese Football Association chuan Chinese Super League football season tawpsan lailawk chu July 25 aṭanga khelh ṭan leh turin an rel a, group pakhat zawk chu Dalian-ah hian an khel dawn a, mahse hri kai thar hmuh an awm leh tak avangin ṭhulh a ni leh ta rih a ni. 

North Korea ramri bul Jilin province-ah pawh May thla tawp lam khan hri kai thar pahnih hmuh an lo ni tawh bawk. April 14 khan China-ah hri kai thar mi 89 an awm a, kha mi hnua hri kai tam ber ni a thleng leh a ni. Dalian leh Urumqi khuaah hian hri kai an awm leh tak avangin lockdown zui a ni. 

Covid-19 hri hi China, Hubei province-a Wuhan khua aṭangin a rawn irhchhuak a, he hri vang hian China chu nasa taka phuh chhiat phah a ni bawk. A tirah chuan China-a hri kai an tam ber ṭhin a, a hnuah Europe lamah he hri hi a ṭaidarh leh a, chumi hnuah America ramah a darh nasa leh a ni. 

China-a health lama thuneitute chuan nimin khan an mahnia natna lang chhuak lo hri kai thei dinhmuna ding mek mi 302 an awm thu an tarlang a, tunah hian China a hri kai mek hi mi 331 an awm a ni.