Myanmar sipai sorkarin ASEAN a vau let

Myanmar sipai sorkar chuan Association of Southeast Asian Nations (ASEAN) member ramte chu Myanmar rama muanna siam tura hun bituk siamsak a, an nawr na lutuk a nih chuan nghawng ṭha lo zawk a thlen thei dawn tiin a vau let.

ASEAN foreign minister-te hian Ningani khan Jakarta-ah meeting an nei a, Myanmar tualchhung buaina thleng mek chungchangte an sawiho a, mahse meeting-ah hian Myamnar ram aiawh an tel lo. Hemi ni vek hian Myanmar foreign ministry chuan ASEAN ramte chu nawr na lo tura an phutna thuchhuah hi an tichhuak zui ve nghal a ni.

ASEAN chuan Myanmar sipai hotute nena peace plan an lo siam tawh chu kenkawh zel an la tum tih chair Cambodia chuan a tarlang. Hetih lai hian thla 18 liam taa ASEAN leh Myanmar sipai sorkarin peace plan an siam chu kalpui ṭhat a la nih loh avangin ram ṭhenkhatte sawisel pawh an tawk a ni. Nikum aṭang khan ASEAN high-level meeting-ah Myanmar sipai sorkar aiawhte hi tel ve khapsak an ni.

Ningania meeting-ah hian palaite chuan Myanmar rama boruak muanawm a awm thuai theihna turin ASEAN chuan chak zawkin hma la se an duh thu an sawi. ASEAN hi an kalphungah an member ramte pawh ni se, ramchhung inrelbawlna kawngah an inrawlh ngai lo a, mahse Myanmar rama civil sorkar thuneihna hnehchhuh a, sipai sorkar a din hnua tualchhung buaina nasa tak thleng chungchangah erawh huaisen leh na zawka hma la tura ngenna an tawk fo a ni.