Britain sorkarin an ram mipui thau lutuk tihtlem dan ngaihtuah

Britain sorkar chuan an ram mipuite an hrisel zawk theihna turin, mahni nihphung tur aia thau leh rit lutuk awmte tihtlemna tur ruahmanna a siam. 

Prime minister Boris Johnson chuan mi thiamte zirchianna aṭangin thau leh rit lutukte hian hri leng an kai awlsam bik bakah, an thih hma phah theih thu an sawi avangin hma lak a duh a ni. Johnson hian a hma pawhin Europe ram zingah Britain ram mipuite chu  a nawlpuia chhutin an thau ber tih a lo sawi tawh a, hei vang hian sorkar chuan thau lutuk tur venna tana hma lak chu a ngai pawimawh hle a ni, a ti. 

Mipui thau leh rit lutuk tihtlemna tur sorkarin hma lakna zingah hian an ram huna an dar 9 hmain TV leh online advertisement lamah junk food fakna tihchhuah a khap a, hei bakah hian calorie tamna ei tur, 'buy one get one free' tih ang pawh siam a remti tawh lo bawk. Ei tur siamte pawh an menu-ah an ei siama calorie awm zatte tarlang tura tih an ni. 

Public Health Eng­land tarlan danin Britain-a puitling 60% chu an nihphung tur aia thau lutuk emaw rit lutuk emaw an ni. Johnson chuan rihna hloh tura beih chu thil awlsam tak a ni dawn lo a, mahse hei hi an tih theih chuan an chak phahin an hrisel phah sawt dawn tiin a sawi.