China-a US consulate office khar fel a ni ta

China sorkarin khar tura thupek a tihchhuah hnuah, nimin khan Chengdu, China-a US consulate chu khar a ni ta tih US chuan a sawi. Hemi hma, kar liam ta khan US sorkar thupek angin Houston-a Chinese Consulate chu khar a lo ni tawh bawk. 

US State department chuan nimin chawhma dar 10 aṭang khan Chengdu-a US Consulate-ah hna thawh tihtawp a nih thu leh, office-a America flag zar pawh zing 6.18 khan pawh hniam a ni bawk. Office hi khar a nih hnuah police-te chuan he office bula block ṭhenkhatte chu an khar lailawk zui bawk a ni tiin China Ministry of Foreign Affairs chuan a tarlang. 

Coronavirus vaccine siam tumna kawnga an information pawimawh­te China-in lak ruk a tum nia sawi leh, US-a company 100 dawn chu China hian hack a tum nia a puh avangin US sorkar chuan Houston-a Chinese consulate a khar tir. China chuan hei hi chhang letin, Chengdu-a US consulate hi a khar tir ve nghal a ni. 

Ram pahnih hi insumdawn tawn­na, technology, security leh human rights chungchangah an inkar boruak a la ṭha lo chho zel a ni.