Catalonia minister hlui pariat man

Spain aṭanga Catalonia bial inlakhran tum chungchangah Catalonia regional government-a minister hlui pariatte manna thupek chu Spanish judge-in Ningani khan tichhuakin man nghal an ni.

Catalonia minister hluite hi Spain dodal zawnga che leh helah puhin chhui mek an ni. Catalonia-in Spain aṭanga indepenence a puan chungchangah pawh inhnamhnawiha puhin state prosecutor-ten an chhui mek a, Ningani khan manna tur thupek hi tihchhuah a ni ta a ni.

State prosecutor chuan National Court hnenah Catalan president paihthlak tak, Carles Puigdemont leh minister ban tak pali-te manna thupek pawh Europe ram pumah tichhuak turin a ngen bawk. Puigdemont leh a minister hlui pali-te hi Belgium khawpui, Brussels an an awm mek a ni. Catalan minister hlui man zingah hian Vice President hlui Oriol Junqueras leh Catalan sorkar thupuangtu hlui Jordi Turull te pawh an tel a ni.

Puigdemont-a ukil, Jaune Alonso-Cuevillas chuan judge thupek tihchhuah chu sawiselin, dik lo taka rorelna, democracy tana ni duhawm lo tak a nih thu a sawi. Hetih lai hian Belgian attorney chuan Spain aṭanga Puigdemont manna tur thupek hi an dawng a nih chuan dan zawm ngei an tum tih a sawi. Puigdemont hian a chungthu dik taka relsak a nih dawn loh chuan Spain-a kir a tum loh thu a sawi.

Catalan minister hluite man an nih avanga lungawi loin Ningani tlai khan Barcelona-ah mi tam tak chu Catalan Parliament kawtah leh Gothic Quarter kawtah an pungkhawm.

Catalonia sorkar hian October 1 khan Spain aṭanga independence duh leh duh loh chungchangah mipui vote a la a, vote thlak zinga a tam zawk chuan inlakhran hi an duh a ni. Mahse Spain sorkar laipui chuan he vote lak hi a pawmpui lo a, Constitutional Court pawhin dan kalh niin a puang a ni. Hemi hnu hian Catalonia sorkar chuan indepdence puan leh puan loh tichiang tura hun pek a ni a, kar kalta Inrinni khan Catalonia sorkar chuan independence puan thu chu a nemnghet a, hei vang hian regional parliament chu ṭhiahsakin Spain sorkar laipuiin direct-in a ro rel nghal a, December 21-a local election nei turin a rel nghal bawk a ni.